ጅቡቲ፣ መስከረም 14 ቀን 2019 ዓ.ም. — ከኢትዮጵያ እስከ ጅቡቲ የሚዘረጋና ሁለቱን ሃገራት የሚያገናኝ የነዳጅ ማከማቻና የማስተላለፊያ መስመር መሰረተ ልማትን ግንባታ መጀመርን የሚያበስር የመሰረት ድንጋይ በዛሬው እለት በኢትዮጵያ ፌዴራላዊ ዲሞክራሲያዊ ሪፐብሊክ ጠቅላይ ሚኒስትር ክቡር ዶ/ር አብይ አህመድ፣ በጅቡቲ ሪፐብሊክ ፕሬዝዳንት ክቡር እስማኤል ዑመር ጌሌ እና በዳንጎቴ ግሩፕ ፕሬዝዳንት አልሃጂ አሊኮ ዳንጎቴ አማካኝነት ተቀምጧል።
ይህ ታሪካዊ መሰረተ ልማት በጅቡቲ ከሚገኙ የባህር ላይ ነዳጅ መቀበያ እና ማከማቻ ተቋማት የሚራገፈውን ነዳጅ በሚዘረጉት ማስተላለፊያ መስሮች አማካይነት ኢትዮጵያ ከሚገኙ ከማከማቻ እና ከማከፋፈያ መሰረተ ልማቶች ጋር የሚገናኝ ሲሆን፣ የተቀናጁ የነዳጅ ምርቶችን ወደ ኢትዮጵያ በቀላሉ በማስተላለፍ የተቀላጠፈ የአቅርቦት ሰንሰለትን ይፈጥራል።
የመሰረተ ልማቱን ግንባታ ለማከናወን የኢትዮጵያ መንግስት የስትራቴጂካዊ የኢንቨስትመንት ክንድ የሆነው የኢትዮጵያ ኢንቨስትመንት ሆልዲንግስ (ኢኢሆ)፣ ዳንጎቴ ኢንዱስትሪስ ሊሚትድ እና ግሬት ሆርን ኢንቨስትመንት ሆልዲንግ መካከል በዛሬው እለት የመግባቢያ ስምምነት ተፈራርመዋል።
ይህ ፕሮጀክት ለቀጠናው ከፍተኛ የመሰረተ ልማት ዕድል የሚፈጥር ሲሆን፣ ዋና ዋና የሎጂስቲክስ ማነቆዎችን የማስወገድ፣ የነዳጅ ምርት አቅርቦት ተመጣጣኝነትና ውጤታማነትን የማሻሻል፣ የትራንስፖርት ወጪን የመቀነስ እና የኢትዮጵያን ኢኮኖሚ እድገትን የሚደግፍ ነው።
በተጨማሪም ይህ ፕሮጀክት ኢትዮጵያ ከጅቡቲ ጋር ያላትን ትስስር በማጠናከር፣ ለላቀ ቀጠናዊ ውህደት እና ተወዳዳሪነት አስተዋፅኦ የሚያበረክት ነው። የማስተላለፊያ መስመሩ የነዳጅ አጠቃቀምን በማሳደግ ከዚህ ቀደም ከተለመደው ነዳጅን በየብስ ትራንስፖርት አማካኝነት ብቻ የማስተላለፍን ጥገኝነትን የመቀነስ እና ከዘርፉ ጋር የተያያዘውን የካርቦን አሻራ (carbon footprint) የመቀነስ አቅም አለው።
“የኢትዮጵያን የነዳጅ አቅርቦት ሰንሰለት ለማጠናከር፣ ቀጠናዊ ትስስርን ለማሻሻል እና ሀገራችን ያላትን ተወዳዳሪነት ለማሳደግ ይህ ፕሮጀክት ይዞት የሚመጣው ዕድል ትልቅ ነው” በማለት የኢትዮጵያ ኢንቨስትመንት ሆልዲንግስ ዋና ስራ አስፈፃሚ ዶ/ር ብሩክ ታዬ በጉዳዩ ላይ የተናገሩ ሲሆን ዶ/ር ብሩክ አክለውም “እንደ ኢኢሆ፣ ትኩረታችን ወሳኝ መሰረተ ልማቶችን በሚያጠናክሩ እና የረጅም ጊዜ እሴትን በሚፈጥሩ ኢንቨስትመንቶች ላይ እንደመሆኑ ይህ ዛሬ የተፈራረምነው የመግባቢያ ስምምነትና ስራውን ለማስጀመር የተጣለው የመሰረት ድንጋይ የምንጀምረው ስራ የአቅርቦት ውጤታማነትን ለማሻሻል፣ ቀጠናዊ ውህደትን ለማጥበቅ እና የትራንስፖርት ዘርፉን ለመደገፍ ትልቅ አቅም ያለው ነው” ብለዋል።
የዛሬው ስምምነት በኢኢሆ እና በዳንጎቴ ግሩፕ መካከል እያደገ የመጣውን የኢንቨስትመንት ቁርኝት የሚያጠናክር ሲሆን፣ ከዚህ ቀደም በጎዴ በሚገኘው እና በዓመት ሶስት ሚሊዮን ቶን የማምረት አቅም ባለው በ2.5 ቢሊዮን ዶላር የዩሪያ ማዳበሪያ ማምረቻ ፋብሪካ ግንባታ ላይ አብረው ለመስራት የጀመሩት ስራ የሚታወስ ነው።
ይህ የኢንቨስትመንት መጠኑ 660 ሚሊየን ዶላር የሚሆንና ግንባታው ከተጀመረ በሁለት አመታት ባልሞላ ግዜ ውስጥ ለማጠናቀቅ የታቀደው ፕሮጀክት ወሳኝ መሰረተ ልማቶችን ለማጠናከር፣ ቀጠናዊ ትስስርን ለማሻሻል እና የኢትዮጵያን ኢኮኖሚያዊ ውህደት ከቀጠናው ጋር ለመደገፍ የሚደረገውን ሰፊ ጥረት የሚያንፀባርቅ ነው።
ስለ ኢትዮጵያ ኢንቨስትመንት ሆልዲንግስ
የኢትዮጵያ ኢንቨስትመንት ሆልዲንግስ (ኢኢሆ) በሚኒስትሮች ምክር ቤት ደንብ ቁጥር 487/2022 የተቋቋመ ድርጅት ነው። ኢኢሆ በስሩ የሚገኙ የመንግስት የልማት ድርጅቶችን በሙያው በማስተዳደር፣ ከዓለም አቀፍ ምርጥ ተሞክሮዎች እና የድርጅት አስተዳደር መርሆዎች ጋር በማጣጣም ለዘላቂ የኢኮኖሚ ልማት አስተዋፅዖ ለማድረግ ያለመ ተቋም ነው። የኢትዮጵያ መንግስት ስትራቴጂካዊ የኢንቨስትመንት ክንድ እንደመሆኑ መጠን፣ ለአሁኑ እና ለወደፊት ትውልድ የሚጠቅም እሴትን ለማሳደግ አስቦ የሚንቀሳቀስ ተቋም ነው::